Ney wamitego na video 4 za wimbo mmoja

MONDAY , 8TH AUG , 2016

Msanii Ney wa Mitego amesema ana mpango wa kutoa video nne tofauti tofauti za wimbo mmoja wa 'Pale kati patamu', ambao ulimletea balaa hivi karibuni kutoka kwa Baraza la Sanaa Tanzania (BASATA) ambalo limeufungia.

Akiongea kwenye Planet Bongo ya East Africa Radio, Ney wa Mitego amesema amefikia kufanya uamuzi huo kwani wimbo huo una version tofauti tofauti, hivyo kila version itakuwa na video yake, ili kuepuka tena rungu la BASATA.

"Wimbo utakuwa na video nne tofauti, jumatano inatoka video ya kwanza, bahati nzuri wimbo una version mbili za audio tayari, kuna audio ambayo inaenda sana mtaani na club, na kuna audio ambayo ipo kwa ajili ya media, kwa hiyo kuna video mbili pia, itakuwa kuna ambayo inaenda club na kuna ambayo inaenda kwenye media pia," alisema Ney wa Mitego.

Ney aliendelea kusema kuwa sababu nyingine kubwa ni kwamba wimbo huo unafanya vizuri zaidi nje ya nchi licha ya kupigwa marufuku nchini Tanzania, hivyo ameona si vema iwapo ataacha wimbo huo uende bila video.

"Original version ya audio ya kwanza inapigwa zaidi nje ya nchi kuliko wimbo wowote, Nigeria, Ghana, so still tunaona ni audio ambayo haitakiwi kuacha hivi hivi, na pia inatarajiwa kufanyiwa remix na wasanii wengine wa nje ya Tanzania," alisema Ney wa Mitego.